Χάν’τανε τα συνήθεια

0
34

Εφέκαμ’ τα χωρία μουν

τ’ οσπίτια, τα αυλία,

με τα περβόλια τα’ έμορφα

τ’ αχερών’, τα μαντρία.

 

Εφέκαμε την αυλαγάν

κ’ έναν σιρίν δεντρόπα,

όθεν αφκά εκάθουμ’νες

όντας έμ’νες παιδόπα.

 

Εφέκαμε τα πρόατα,

τα χτήνια όλεν τον βίον,

τη κοπαδί’ τα’ ωρίαμαν

‘ς σην ζέστιαν και ‘ς σον κρύον.

 

Είχαμε εκεί το βούτορον,

το ταν’, το σιρ, το γάλαν,

τ’ οξύγαλον, το τσοκαλίκ’

την καβουρμάν, την σάλαν.

 

Εφέκαμε το ζούμωτρον,

το φουρνίν, τα ψωμία,

το απολάδ’ και το κερέτσ’,

τα τρανά τα φελία.

 

Εφέκαμε τον πετεινόν

με το ζηλ’ τη λαλίαν,

π’ εγνέφιζεν μικρούς, τρανούς

να πάνε ‘ς σην δουλείαν.

 

Εχάσαμε το παρακάθ’,

τα καλά τα παρέας,

την λαλίαν τη ταουλί’

κι ίλλιαμ’ τα τοξαρέας.

 

Αγάπην, σέβας, εντροπήν

είχαμε ‘ς σην καρδίαν,

όλ’ έμ’νες συενόπιστοι

εποίν’ναμ’ γειτονίαν.

 

 

Έναν καμπάναν έκουες

κ’ έναν ποπά λαλίαν,

εντάμαν ολ’ ευρίουμ’νες

απέσ’ ‘ς σην εγκλεσίαν.

 

Όλια ατά τα έμορφα

ντο είχαμ’ ‘ς σα χωρία,

εφέκαμ’ ατα οι περισσοί

κ’ έρθαμ’ ‘ς σην πολιτείαν.

 

‘Κι θέλω να μακρολογώ,

θα λέω την ορθίαν,

χάν’τανε τα συνήθεια

ντο έχ’νε ιστορίαν.

 

Συνήθεια ντο έτανε

έμορφα τιζεμένα,

ελέπομ’ ατα αδά κι ακεί

όλια ταουτεμένα.

 

Όσον ωτο διαβαίν’ ο καιρόν

τρώει με αροθυμία,

‘ς σον τόπον ντο ετράνυνα

ν’ εζήν’να αλλομίαν.

 

Άμον ντο νουνίζω εγώ

θαρώ άλλ’ πα νουνίζ’νε,

θέλ’νε να κλώσκουνταν οπίσ’

τ’ οσπίτια ‘τουν να χτίζ’νε.

 

Τα τουβάρια ντ’ εδέβαν κα

ας σην πολυκαιρίαν,

να χτίζ’νε, να ορθών’ν ατα

να δίγ’ν ατα αξίαν.

 

Ας είν’ τ’ οσπίτια μουν εκεί

έμορφα γουρεμένα,

τα πόρτας ακαράκωτα,

τ’ αυλία σπογγιμένα.

 

 

 

 

Και όσον ντ’ επορούμ’ εμείς

πυκνά-πυκνά ας πάμε,

ν’ ευρήκομε ντ’ εχάσαμε

και ντο ιεύ’ να φτάμε.

 

Ακόμαν σίτια εν’ καιρός

και όσον εμείς ζούμε,

ν’ ευτάμε τα συνήθεια

όσον ντο επορούμε.

 

Κι ας έρταν τα παιδία μουν

να χτίζ’νε κοινωνίαν,

για ταόλεν τον Ελλενισμόν

για την Ορθοδοξίαν.

 

Από το βιβλίο του Γιάννη Μιχαηλίδη

΄΄Έλα Διογένη να ελέπ’ς΄΄

Ποιήματα

Εκδόσεις Αδελφών Κυριακίδη α.ε.  2008

 

Please follow and like us:
Facebook
Facebook
Google+
Google+
https://pagoinia.gr/%cf%87%ce%ac%ce%bd%cf%84%ce%b1%ce%bd%ce%b5-%cf%84%ce%b1-%cf%83%cf%85%ce%bd%ce%ae%ce%b8%ce%b5%ce%b9%ce%b1/
Instagram
Follow by Email